28. júlí 2010

Ungu strákarnir hresstu uppá HK í jafntefli við Gróttu

HK og Grótta skildu jöfn, 2:2, í 1. deild karla á Kópavogsvelli í kvöld. Jónas Grani Garðarsson gerði bæði mörk HK og kom liðinu yfir á 8. mínútu. Daniel Howell jafnaði fyrir Gróttu á 27. mínútu og Sölvi Davíðsson kom Seltirningum í 1:2 á 63. mínútu. Jónas Grani jafnaði síðan úr vítaspyrnu á 85. mínútu eftir að brotið var á Andra Valgeirssyni, sem kom inná og lék sinn fyrsta deildaleik fyrir HK.

Grótta var sterkari aðilinn í fyrri hálfleik og HK í þeim síðari. Gróttumenn voru hinsvegar alltaf hættulegir og gerðu sig af og til líklega til að komast í 1:3 áður en HK jafnaði metin. En á æsispennandi lokamínútunum gat sigurinn dottið hvoru megin sem var og þegar liðnar voru þrjár mínútur af uppbótartíma brunaði Axel Birgisson inní vítateig Gróttu og skaut rétt framhjá úr góðu færi.

Bein textalýsing frá leiknum er neðar í þessari frétt.

HK er þá komið með 16 stig og seig niður í 8. sætið en komst samt lengra frá fallsætum deildarinnar því Njarðvík og Fjarðabyggð töpuðu bæði og sitja þar með 11 stig.

Staðan í deildinni.

Þrír kornungir varamenn hresstu heldur betur uppá lið HK í seinni hálfleiknum. Birgir Ólafur Helgason, 17 ára, kom inná eftir nokkrar mínútur í síðari hálfleik og þeir Axel Birgisson, 18 ára, og Andri Valgeirsson, 19 ára, spiluðu síðasta korterið og létu mikið að sér kveða. Þá var hinn 17 ára gamli Hólmbert Aron Friðjónsson valinn maður leiksins hjá HK en hann lét vörn Gróttu hafa mikið fyrir sér allan tímann.

Fimm leikmenn úr 2. flokki voru í liði HK síðustu 15 mínúturnar því Birgir Magnússon, 19 ára, spilaði allan leikinn. Brynjar Víðisson og Ólafur V. Júlíusson voru í liði HK í kvöld eftir langa fjarveru, Brynjar síðan um miðjan maí og Ólafur frá því í fyrravor.

Tómas Ingi Tómasson þjálfari HK gerði tvær breytingar á byrjunarliðinu fyrir leikinn Þeir Ólafur og Brynjar komu inní liðið í staðinn fyrir Hafstein Briem, sem var í leikbanni, og Inga Þór Þorsteinsson, sem er meiddur. Atli Valsson, sem kom inná fyrir Inga eftir 15 mínútur gegn Þrótti, er líka frá vegna meiðsla og spilar ekki næstu sex vikurnar eða svo.

Liðið var þannig skipað:

Markverðir:
Ögmundur Ólafsson

Varnarmenn:
Ragnar Mar Sigrúnarson (Birgir Ólafur Helgason 49.)
Davíð Magnússon 
Ásgrímur Albertsson 
Hörður Árnason 

Miðjumenn:
Brynjar Víðisson 
Ólafur V. Júlíusson (Andri Valgeirsson 75.)
Jónas Grani Garðarsson 
 
Framherjar:
Aaron Palomares (Axel Birgisson 75.)
Hólmbert Aron Friðjónsson 
Birgir Magnússon 

Varamenn:
Egill Þorsteinsson  
Samúel Arnar Kjartansson 

Utan hóps:
Almir Cosic (í fríi) 
Atli Valsson (meiddur)
Bjarki Már Sigvaldason (meiddur)
Hafsteinn Briem (í leikbanni)
Hörður Magnússon (meiddur)
Ingi Þór Þorsteinsson (meiddur)
Jörundur Kristinsson 
Leifur Andri Leifsson (í leikbanni)
Stefán Tandri Halldórsson (meiddur)
Bjarki Eldjárn (spilar með Ými)
Damir Muminovic (í láni hjá Hvöt)
Jóhann Ingi Jóhannsson (spilar með Ými)
Jón Einar Hjaltested (spilar með Ými)
Þórður Birgisson (í láni hjá KS/Leiftri)
 
* HK notaði 14 leikmenn að þessu sinni. Andri lék sinn fyrsta leik með meistaraflokki HK á Íslandsmóti. Sjá nánar: Leikmenn meistaraflokks karla 2010.

* Ásgrímur sló félagsmet Gunnleifs Gunnleifssonar í leikjafjölda á Íslandsmóti en hann hefur nú leikið 159 deildaleiki fyrir HK. Gunnleifur á þó enn heildar leikjametið. Davíð lék sinn 170. meistaraflokksleik, Aaron lék sinn 90. meistaraflokksleik og þann 60. á Íslandsmóti. Sjá nánar: Tölfræði mfl. karla.

* Þetta var 8. mótsleikur HK og Gróttu frá upphafi. HK hefur unnið 3 leiki, Grótta 2, og 3 hafa endað með jafntefli. Sjá nánar: Mótherjar.

* Næsti leikur HK er gegn ÍR á ÍR-vellinum föstudaginn 6. ágúst klukkan 19. Sjá nánar: Leikir mfl.ka. 2010.

Leikurinn var í beinni textalýsingu hér á HK-vefnum:

90+4 Leik lokið eftir mikla spennu í lokin. Jafntefli sennilega ásættanlega niðurstaða fyrir bæði lið þar sem Grótta var sterkari aðilinn í fyrri hálfleik en HK í þeim síðari.

90+3 Axel sleppur í gegn vinstra megin, alla leið inní vítateig, í fínt færi, en skýtur hárfínt framhjá stönginni fjær.

90+2 Hætta í vítateig HK en Elvar Freyr skýtur yfir markið.

90+1 Brynjar með aukaspyrnu frá vinstri kanti, boltinn skallaður frá marki Gróttu, Birgir Ólafur nær skoti utan teigs en í Grana og afturfyrir.

90. Gult spjald á Hrafn í Gróttu fyrir að stöðva Hörð Á. sem var að sleppa upp vinstri kantinn.

89. Ögmundur bjargar eftir að Sölvi var kominn í þröngt færi innvið markteig. Horn Gróttu í kjölfarið en Hörður Á. skallar frá.

89. Axel kemst innfyrir vörn Gróttu eftir langa sendingu en missir boltann frá sér til markvarðar.

88. Birgir M. snýr sér skemmtilega og skýtur af 20 m færi en framhjá.

85. MARK!! 2:2. Jónas Grani Garðarsson skorar örugglega úr vítaspyrnunni.

84. VÍTI. Andri Valgeirsson felldur!!! Inn við markteig eftir þunga sókn HK.

83. HK pressar en nær ekki að skapa sér færi gegn grimmri vörn Gróttunnar.

78. Birgir M. sendir fyrir frá hægri, boltinn fer af varnarmanni, í þverslá Gróttumarksins og út. Sending fyrir á ný frá vinstri og Grani er aðeins of seinn, Kristján gómar boltann af tám hans.

77. Hólmbert fær langa sendingu fram en missir af boltanum í vítateignum, til Kristjáns markvarðar.

77. Hættuleg sókn Gróttu en Ögmundur nær að góma boltann eftir sendingu frá vinstri.

75. Tvöföld skipting HK: Axel og Andri koma inná fyrir Ólaf og Aaron.

75. Stór hætta eftir sendingu Birgis frá vinstri en dæmd aukaspyrna á Ólaf.

74. Grótta fær hornspyrnu frá vinstri. Howell skallar framhjá marki HK.

72. HK fær hornspyrnu frá vinstri. Gróttumenn skalla frá.

71. Birgir Ólafur leikur á hvern Gróttumanninn á fætur öðrum á hægri vængnum, alla leið inní vítateig, en skot hans er of laust, í varnarmann og til Kristjáns.

70. Hörður Á. skallar boltann innað marki en Kristján markvörður brunar út og er rétt á undan Grana og hirðir boltann.

68. Stórhættuleg fyrirgjöf Aarons frá hægri, Gróttumenn ná að koma boltanum útfyrir vítateig, Brynjar með skot af 20 m færi en framhjá.

68. Snögg sókn Gróttu og fast skot Howells rétt utan vítateigs en beint á Ögmund.

67. Áhorfendur í kvöld eru aðeins 173. Um það bil 20 stuðningsmenn Gróttu eru þeir einu sem heyrist í á vellinum...!

65. Hólmbert sleppur innfyrir vörn Gróttu en er dæmdur brotlegur. Hæpinn dómur... frekar að hangið væri í honum!

63. 1:2 fyrir Gróttu. Eftir innkast frá hægri fær Sölvi Davíðsson boltann inní vítateig, nær að snúa sér og senda hann í fjærhornið.

60. Birgir M. skallar framhjá eftir mikinn sprett Harðar Á. upp vinstri kantinn og fína fyrirgjöf.

59. Davíð fær gula spjaldið fyrir að brjóta á Gróttumanni sem var við það að sleppa í gegn. Rautt, heimtuðu Gróttumenn en sá norski var ekki á því og lyfti því gula. Aukaspyrna á hættulegum stað og ágæt tilraun Péturs Más Harðarsonar en rétt yfir þverslána.

58. Brynjar splundrar vörn Gróttu með sendingu í gegn á Hörð Árna sem brunar inní vítateiginn, einn gegn Kristjáni, en skýtur í hliðarnetið!!! Dauðafæri og HK með öll tök á leiknum sem stendur.

57. Birgir M. krækir í aðra hornspyrnu frá vinstri eftir góðan sprett. Brynjar með hornið, Kristján nær að kýla boltann frá.

56. Birgir Ólafur, 17 ára, er farinn að gera usla úr stöðu hægri bakvarðar. Fín sókn sem hann bjó til og Gróttumenn bjarga naumlega.

54. Elvar Freyr, uppalinn HK-ingur í liði Gróttu, kemur inná fyrir framherjann Magnús sem tognaði og varð að hætta keppni.

52. HK fær hornspyrnu frá vinstri eftir að Birgir M. brunaði upp kantinn og reyndi fyrirgjöf. Góður bolti Brynjars inní markteiginn en Kristján markvörður nær að góma hann. Betri bragur á leik HK þessar fyrstu mínútur seinni hálfleiks.

51. Brynjar með hornspyrnu frá hægri. Birgir M. fær boltann vinstra megin í vítateignum og þrumar á markið í gegnum þvöguna. Kristján Finnbogason ver naumlega í markteignum.

51. Fínt skot Hólmberts utan af hægra kanti og varnarmaður í markteignum bjargar í horn.

49. Skipting hjá HK: Birgir Ólafur kemur inná fyrir Ragnar Mar.

46. Birgir fær stungusendingu frá Hólmberti en Kristján er snöggur út og gómar boltann á vítateigslínu Gróttu.

46. Seinni hálfleikur er hafinn og engin breyting á liði HK. Ekki heldur hjá Gróttu.

45. Hálfleikur og HK má teljast frekar heppið með að sleppa með 1:1 inn í leikhléi. Grótta hefur verið sterkari aðilinn og verið nær því að komast yfir.

45. Sannkallað dauðafæri Gróttu. Magnús brunar inní vítateiginn og þrumar á markið, með jörðu, en Ögmundur ver glæsilega og heldur boltanum. Vel gert.

44. Hættulegt færi Gróttu en reyndar erfiður skalli fyrir Sölva Davíðsson sem nær aðeins að stýra honum laust beint í hendur Ögmundar.

41. Grótta fær hornspyrnu frá vinstri. Ásgrímur skallar frá og sóknin rennur út í sandinn.

39. Grótta fær aukaspyrnu á stórhættulegum stað, í vítaboga HK, eftir hættulega sókn. Howell þrumar beint í varnarvegginn...

37. Ólafur Páll Johnson Gróttumaður fær gula spjaldið fyrir að stöðva Hólmbert sem var á hraðferð upp vinstri kant í skyndisókn.

37. Grótta fær hornspyrnu en Ásgrímur skallar frá af miklum krafti.

36. Stórhættuleg fyrirgjöf Harðar Á. frá vinstri, þvert fyrir markið rétt utan markteigs en þrír HK-ingar í vítateignum voru ekki nógu grimmir og boltinn sigldi framhjá öllum.

34. Daniel Howell er hættulegur sem fremsti miðjumaður Gróttu og nú á hann skot af 25 m færi en nokkuð framhjá marki HK. Seltirningar virka sterkari og þetta verður erfitt ef HK-ingar fara ekki að stimpla sig betur inní leikinn.

31. Grótta fær hornspyrnu frá vinstri. Sent fyrir og Magnús framherji Seltirninga á skot yfir mark HK. Nokkuð hættulegt.

27. 1:1. Grótta jafnar. Vörn HK opnast illa, leikmaður Gróttu kemst að endamörkum vinstra megin innvið markteig og rennir fyrir. Daniel Howell sendir boltann í tómt markið af stuttu færi.

22. Hornspyrna HK frá hægri. Brynjar sendir fyrir, skallað frá, Aaron með skot af 20 m færi en nokkuð framhjá markinu vinstra megin.

22. Það má segja að efsta sætaröðin fyrir miðju á Kópavogsvelli sé þétt setin af leikmönnum HK sem ekki geta spilað af ýmsum ástæðum!

19. Birgir M. með skot rétt innan vítateigs, vinstra megin, eftir sendingu Grana en yfir mark Gróttu.

16. Brynjar fær gula spjaldið fyrir brot á miðjum vallarhelmingi HK. Var áður búinn að fá aðvörun frá norska dómaranum.

14. Magnús framherji Gróttu með fast skot frá vítateig en framhjá markinu hægra megin.

13. Grótta fær hornspyrnu eftir sókn upp hægri kantinn. Uppúr henni á Pétur Már Gróttumaður fast skot frá hægra vítateigshorni en Ögmundur ver örugglega við stöngina nær.

9. Heldur betur hætta við mark HK. Fyrst rúllar boltinn þvert fyrir markið og litlu munar að framherji Gróttu nái að teygja sig í hann. Sóknin heldur áfram og HK-ingar komast í tvígang fyrir skot á síðustu stundu. Púff!!

8. MARK, 1:0..!!!  Jónas Grani Garðarsson kemur HK yfir. Kristján markvörður náði naumlega að stöðva Aaron á markteignum, einhverjir vildu vítaspyrnu, en boltinn féll fyrir Grana sem skorar af yfirvegun frá markteig.

7. Brynjar með sendingu innfyrir vörnina á Birgi M. en Kristján markvörður bjargar með úthlaupi fyrir utan vítateiginn.

6. Þung pressa HK-inga og Gróttumenn ná tvívegis að bjarga við markteiginn á síðustu stundu. Birgir og Hólmbert voru ágengir.

4. HK hefur náð að standa af sér pressu á upphafsmínútum leiksins og fær  fyrstu hornspyrnuna. Brynjar sendir fyrir en Kristján Finnbogason, hinn reyndi markvörður Gróttu og fyrrum landsliðsmarkvörður, nær að slá boltann og vörnin hreinsar.

1. Leikurinn er hafinn í blíðunni á Kópavogsvelli. Dómarinn í kvöld er norskur og heitir Håvard Hakestad. HK leikur í átt til sjávar.

Mynd: Andri Valgeirsson kom inná sem varamaður og krækti í vítaspyrnu undir lokin. 

Til baka

Miðvikudaginn 8.september

18.00 ÍBV/KFS - HK/Ýmir, 2.ka., knatt.

Fimmtudaginn 9.september

17.15 Breiðablik - HK, Undanúrslit 3.ka., knatt.

Föstudaginn 10.september

17.00 HK - Breiðablik, úrslitaleikur 4.ka.A, knatt.

Laugardaginn 11.september

14.00 HK - Þór, 1.deild ka., knatt.

Þriðjudaginn 14.september

17.30 HK/Ýmir - Fram, 2.ka., knatt.

Laugardaginn 18.september

14.00 Víkingur R. - HK, 1.deild ka., knatt.




Skoða alla skráða atburði

Hvar endar HK í 1. deild karla í sumar?

1.-2. sæti

3.-4. sæti

5.-6. sæti

Neðar