Fréttir

Það eru spennandi tímar framundan hjá íþróttafélaginu HK, en undirbúningur er hafinn að uppbyggingu keppnisvallar og stúku fyrir utan Kórinn, en undanfarin ár hefur HK leikið heimaleiki sína í knattspyrnu innanhúss í Kórnum. Á vormánuðum verða svo lóðir boðnar út í Vatnsendahvarfi, en reiknað er með 500 íbúðum í hverfinu svo iðkendum HK á eftir að fjölga mikið á komandi árum. Starfshópur um fyrirhugaða uppbyggingu við Kórinn var settur á laggirnir í fyrra sem skoðaði mismunandi sviðsmyndir fyrir svæðið.

Handknattleiksdeild HK hefur ráðið Halldór Jóhann Sigfússon sem næsta aðalþjálfara meistaraflokks karla. Samið er við Halldór Jóhann frá og með næsta keppnistímabili til þriggja ára. Stjórn handknattleiksdeildar HK þykir mikill fengur að fá jafn reyndan þjálfara til liðs við félagið og er ráðning hans liður í því að styrkja enn frekar meistaraflokk karla. Halldór Jóhann kemur til HK frá danska úrvaldsdeildarliðinu Nordsjælland Håndbold en hann var þar áður aðstoðarþjálfari úrvalsdeildarliðs TTH Holstebro. Halldór Jóhann hefur einnig þjálfað lið Selfoss, Fram og FH hér heima auk yngri landsliða ásamt því að hafa verið þjálfari landsliðs Barein á HM árið 2021. Velkominn Halldór!